Во случај на Брегзит без договор, Британија веднаш ја укинува слободата на движење

Во случај на Брегзит без договор, Британија веднаш ја укинува слободата на движење
20.08.19   11:25

Прочитано : 369

Print This Article
Bregzit

Велика Британија порача дека во случај на Брегзит  без договор, на 31 октомври веднаш ќе ја укине слободата на движење, што е заострување на ставот во однос на претходната влада, иако премиерот Борис Џонсон порача дека земјата нема да биде непријателски расположена кон имиграцијата.

Поранешната премиерка Тереза Меј, која Џонсон ја наследи на 24 јули, предвидуваше „транзиски период“ дури и во случај Велика Британија да излезе од ЕУ без договор, што на европските граѓани ќе им овозможеше да патуваат во Велика Британија, за работа или студирање, без посебни чекори што во такви ситуации треба да се преземат.

-Слободата на движење, таква како што денеска постои, ќе заврши на 31 октомври кога Велика Британија ќе ја напушти ЕУ. По Брегзит владата ќе воведе нов и поправеден имиграциски систем во кој приоритет ќе бидат вештините и тоа како овие луѓе ќе можат да и придонесат на Велика Британија, а нема да биде местото од каде тие доаѓаат, изјави портпаролката на Даунинг Стрит.

Деталите за новите правила за слободно движење наскоро ќе бидат познати, а ќе вклучуваат и построги проверки за евентуално криминалното минато на оние кои сакаат да влезат на островот.

-Тоа не значи дека ќе спречиме доаѓање во земјата и тоа не значи дека непријателски ќе се однесуваме кон имиграцијата и имигрантите, рече премиерот Џонсон за Би-Би-Си Радио Корнвел.

-Имиграцијата во Обединетото Кралство демократски ќе се контролира и ќе создадеме систем по примерот на Австралија, додаде Џонсон.

The3million, здружение кое ги претставува интересите на 3,6 милиони Европејци кои престојуваат во Велика Британија, изрази незадоволство од новата одлука.

„Тоа е неодговорно и ги отвора вратите за дискриминација генерално, напишаа тие на Твитер.

Корбин бара предвремени избори и ветува нов референдум за Брегзит

Лидерот на британските лабуристи Џереми Корбин вчера побара предвремени избори во Велика Британија за да се одблокира застојот околу Брегзит, во момент кога премиерот Борис Џонсон притиска за распуштање на парламентот.

Корбин вети дека доколку неговата Лабуристичка партија победи на тие избори, тој ќе распише втор референдум за излегување на Велика Британија од Европската унија, по првиот што се оддржа во 2016 година и на кој жителите се изјаснија за излегување на земјата од Унијата.

Новиот лидер на конзервативците и актуелен премиер, Борис Џонсон, не сака да распише избори, но можно е тој, сепак, да биде присилен на тоа доколку не му се изгласа доверба во парламентот.

-Лабуристите веруваат дека одлуката за решавање на кризата околу Брегзит треба да им се препушти на граѓаните, рече Корбин, пренесен од британскиот „Прес асосиејшн“

„Доколку есенва дојде до  предвремени избори лабуристите ќе се одважат и ќе одржат нов референдум, последниот збор да им се даде на граѓаните и да им се понудат веродостојни опции, па и опцијата останување“, рече Корбин.

Џонсон вети дека Велика Британија ќе ја изведе од Европската унија до 31 октомври, со или без договор.

ЕУ нема намера да го разгледа неговото барање за повторување на преговорите за договор што веќе беше договорен со неговата претходничка Тереза Меј.

  Категории: