Владеењето на правото предуслов не само за економски, туку за севкупен раст на општеството

Владеењето на правото предуслов не само за економски, туку за севкупен раст на општеството
26.08.19   13:51

Прочитано : 98

Print This Article

Економски раст не е можен без владеење на правото, порачаа денеска учесниците на форумот што го организираше Стопанската комора на Македонија.

Укажаа и дека институциите се социјалната инфраструктура која го влече општеството напред. Мора да бидат ефикасни и да функционираат за и останатите чинители (работна сила, капитал, технологија) да дадат резултат.

-Бизнисот има потреба од доверба, сигурност и правен континуитет. За да обезбедиме економски раст, сфативме дека мора да се занимаваме со теми како оваа денеска. Владеење на правото не е неопходно само за раст на економијата, туку и за државата воопшто, истакна претседателот на Комората, Бранко Азески.

Бизнис заедницата смета дека деловното опкружување во земјава се уште не е на задоволително ниво.

-Постојните проблеми (сивата економија, корупцијата, нееднаквите правила на игра, бавната администрација и уште побавните судски постапки) не се од вчера, туку се натрупани подолг период. Ако кон нив се надополнат и проблемите актуелни деновиве, поврзани со неефикасноста и несоодветното постапување на органите во правосудстсвото, тогаш несомнено проблемот со владеење на правото е нешто што треба да се третира особено сериозно ако сакаме да создадеме услови кои ќе овозможат непречено функционирање на државата, рече Милевска Штрбевска и додаде дека за владеење на правото потребна е стабилна политичка, правна и социјална култура.

Според неа, најмалку владеење на правото има во делот на службените овластувања и положби кои се злоупотребуваат, а највеќе, што е, оцени, зачудувачки, во делот на правната сигурност и еднаквоста пред законот. -Тоа е така зашто државата го има уредено на хартија. Сепак, недостига имплементација, истакна Милевска Штрбевска.

Веројатно, дополни, носителите на државната власт, во обид да се справат со корупцијата и организираниот криминал, многу повеќе посветуваат внимание на апсење криминални групи и на донесување регулатива, а многу помалку на превентивно делување и спречување на овие појави.

-На бизност му требаат стабилно и предвидливо деловно опкружување, ефикасни институции и независно судство, но секако е неопходно и бизнисот да ги почитува правилата и нултата корупција. Бизнисот треба да учествува во донесувањето на законите, заедно со власта и Парламентот, за да се инкорпорираат неговите интереси и потреби, рече евроамбасадорот Самуел Жбогар и уште еднаш укажа на потребата да се подигне гласот за секој да ја почитува својата улога во општеството, а политиката да се тргне од судството.

За значењето на институциите и нивната ефикасност, зборуваше потпрестедателот на Стопанската комора, Глигор Бишев. -Јака држава и силна економија се можни само со јаки и ефикасни институции кои треба да обезбедат транспарентност, доверливост, сигурност. На ова мора уште да се работи, порача Бишев.

view more articles

Актуелно

view more articles

Останати вести