Што Норд Маседониа може да научи од Нордвизија

Што Норд Маседониа може да научи од Нордвизија

Ви пренесуваме дел од колумната на Сашо Кокаланов за Призма:

Не може на човека да не му падне мака кога го гледа Стево Пендаровски како си ја работи работата претседател. Се однесува како да нема никакво чувство за старите македонски обичаи и дејствува на меѓународната сцена без грам национално достоинство. Гледајте го, Франција ни удира вето, Стево трча во Париз да разговарал со неговиот колега Макрон на темата.

Не толку одамна, кога на тоа место беше еден лик од народот, еден фронтмен на македонската борба за станување светска велесила час поскоро, сѐ се решаваше на многу пофамилијарен, понароден, потрадиционален и подостоинствен начин. Наместо да се трошат пари за авионски билети Скопје-Париз-Скопје и за хотелско сместување, поразите се споделуваа заедно со народните маси, а солзите капеа директно во казаните за варење грав, печење ајвар, чварки или ракија.

Хорхе, во оние убави не толку дамнешни времиња, ќе заминеше на некоја пивтијада од каде што ќе фрлеше отровни стрели кон Франција, со мирис на лук и чадено ребро, за веднаш потоа, од ракијадата во соседното село, да му фрли клетва до седмо колено на Макрон. Да го утепа во поим! Да му го скисели шампањот во желудникот! Да му го загорчи кавијарот!

Ех, времиња! Сега сме станати вистински северњаци. Клетва ни до трето колено не фрламе, а седмо ни е веќе мисловна именка. И каков е бре тој Парискиот мировен форум, лебати!? Барем да се викаше мировен панаѓур со скара на кило или традиционална форумијада со греена ракија и пастрмајлии, па да разбереме што бара Стево таму. Вака, навистина срамно и недостоинствено.

Целата колумна на Призма на следниот линк.