„Ла верита“ ја враќа демократијата во Македонија

„Ла верита“ ја враќа демократијата во Македонија

Ви пренесуваме дел од колумната на Ерол Ризаов за „Независен“:

Италијанска „Ла верита“, српски „Kурир“ и домашните стари првоборци за слобода и нови курири ја враќаат демократијата во Македонија. Тие се најсилната артилерија и логистика на водачите на востанието за најновото ослободување на заробената држава, која по вторпат ја ослободуваат тие што ја заробија по првпат. Кутра Македонија, ќе бидат цели три децении како е независна и самостојна, а постојано ја заробуваат и ослободуваат истите поробувачи и спасители. Од 29 години независност, едните владееја 15, другите 12 години, а двете партии со своите партнери уште две години заедно. На кого како му се стемнило или разденило, така си ги есапи слободата и демократијата. Македонскиот аршин многу едноставно го одредува нивото на слобода и демократија според тоа кога ти е поарно, кога се на власт нашите или вашите.

Мора да се признае, најсилниот евидентен и досега несоборлив доказ е дека вторите ослободители на заробената држава се многу поголеми јунаци од првите. На нив им беа потребни само две години за да ја спасат земјата од полициски прогони на политички противници и од криминалци. Ги бидува, нема што, се покажаа како поголеми меѓународни хохштаплери од домашните локални џепароши. Додека на првите им требаше цели 11 години да нè ослободат од режимот и ограбувачите на државата и граѓаните, овие вторите, кои си го знаат занаетот, тоа го направија експресно. Со евтина македонско-унгарско-италијанска копродукција и сценарио снимаат секојдневен филмски серијал, шприцер од боза и лимонада, за подвизите на Боки Тредичи. Притоа, сè уште не може добро да се види од Боки главното откритие на спасителите од режимот на Зоран Заев и СДСМ. Па, и не треба да се види, во тоа е поентата, тоа што не се гледа во Македонија се гледа во земјите на ЕУ и во Брисел.

Целата колумна на „Независен“ на следниот линк.